Ezekiel 36

Israel Mualliante tunga Genkholhna

1“Mihing tapa aw, Israel mualliante kiangah thu genkhol inla, ‘Israel mualliante aw, TOPA thugen za un. 2Hih in Thupipen TOPA gen ahi hi: Galte in note tungah, “Leltak! Tanglai-a munsangte eite neihsa suak zo hi,” ci uh hi,’ ci hi. 3Tua ahi ciangin thu genkhol inla, ‘Hih in Thupipen TOPA gen ahi hi: A om lai minamte neihsa na suah nadingun na kimkot panun amaute in hong bengin hong siasakmang uh a, na thuaksak mite un hong elko in hong gensia uh hi. 4Tua ahi ciangin Israel mualliante aw, Thupipen TOPA thugen za un: Hih pen Thupipen TOPA in mualliante le mualneute tung, kuamte le kuamthukpite tung, a kisiasa gamkhingte le galte laksa khuapi siasate le na kimkota minam om laisunte in ciamnuihna-a hong neite tunga hong gen ahi hi. 5Thupipen TOPA thugen in: Ka hazatluatna hangin minam om laisunte le Edom langkhatah thu ka gen khin hi, ahang in, amaute lungsimah hazatna le muanna tawh a gama lonona munte a suh theih nadingun ka gam teng amau neihsa a suah uh hi,’ci hi. 6Tua ahi ciangin Israel gam tawh kisai-in thu genkhol inla mualliante le mualneute tung, kuamte le kuamthukpite tungah: “Hih in Thupipen TOPA gen ahi hi: Note in minamte simmawhna thuak khin na hi manun ka aamna thangpaihna tawh ka pau hi. 7Tua ahi ciangin hih in Thupipen TOPA gen ahi hi: Ka khut lamto-a ka kiciam inah note kimkot-a minamte in zong simmawhna a thuak ding uh hi. ^a

8 “’Ahi hangin no Israel mualliante aw, na hiangte uh zaamin ka mi Israel-te adingin gah na gah ding uh hi, ahang in, amaute inn ah hong ciah baih ta ding uh hi. 9No lamah ka panga kong angvan ding hi; note hong kitovuungin, hong kivawh dinga 10note tung le Israel innkuan tung nangawnah mi ka kibehlapsak ding hi; khuapite ah mite tung kikin a siasate kilam kik ding hi. 11Note tungah mihing ganhing ka khangsak dinga amaute gahpha mahmahin tampitak a pha ding uh hi. A beisa huna bangin na tungah mi ka tengsak dinga, a beisa hun sangin kong daupaisak zaw ding hi. Tua ciangin keimah TOPA ka hilam nong thei ding uh hi. 12Note tungah mi, ka mi Israel-te ka vaksak ding hi. Amaute in nang hong nei ding uh a, nang amaute’ gouluah na hi ding hi; nang in amaute tate na sutkhia ngei nawn kei ding hi. ^b

13 “’Hih in Thupipen TOPA gen ahi hi: Mite in nang tungah, “Mite na nawmvalh a, na minamte’ tate na sutkhia hi,” hong ci uh hi. 14Tua ahi ciangin mi na nawmvalh nawn kei dinga na minamte ta nei loin a om nawn kei ding hi, Thupipen TOPA in cikhia hi. 15Minamte hong engkona hong zasak nawn loin, mite kong simmawhbawlsak nawn kei dinga na minam ka puksak nawn kei ding hi, Thupipen TOPA in cikhia hi,’ ci-in gen in,” hong ci hi. ^c

16 TOPA thu kei tungah hong tung kik a: 17“Mihing tapa aw, Israel mite amau gamah a ten lai-un amaute gamtatna le a nasepnate-un a gam uh ninsak uh hi. Kei muhna ah amaute gamtatna, khasima numeite’ nin tawh kibang hi. 18Tua ahi ciangin amau gamah mihing sisan a luansakna uh le a gam uh milimte-in ninsak uh ahi manin amaute tungah ka thangpaihna ka sungkhia hi. 19Minamte lakah ka delhzaka, gam citengah kithehthang uh hi. Amaute gamtatna le a nasepnate uh tawh kizui-in amaute tungah thu ka khen hi. 20Minamte laka a paina peuhpeuh uah ka min siangtho a daisak uh hi, tua hangin amaute tawh kisai-in, ‘Hihte TOPA mite hi napi ama gam a nusia uh hi,’ kici hi. 21Israel innkuante in a paina peuhpeuh uh minamte laka a daisak uh ka min siangtho ka khual hi.

22 “Tua ahi ciangin Israel innkuante tungah: Hih in Thupipen TOPA gen ahi hi: ‘Israel innkuante aw, hih ka bawl ding nate note kong khualna-a ka bawl hi lo hi. Note in minamte laka na paina peuhuah na daisak uh ka min siangtho ka khualna ahi hi. 23Minamte laka na daisak uh, amaute laka na daisak uh ka min alian mahmah ka min a sianthona kong lak ding hi. Note tungtawnin amaute mai-ah keimah ka sianthona kong kilah ciangin minamte in keimah TOPA ka hilam hong thei ding uh hi, Thupipen TOPA in cikhia hi.

24 “‘Ahang in, minamte lak panin kong lakhia ding hi; gam khempeuh panin kong khawm dinga nomau gamah kong puak kik ding hi. 25Note tungah tui siangtho kong theh dinga na siang ding uh hi; na siantho lohna khempeuh uh ahi na milimte khempeuh panun kong siangsak ding hi. 26Note lungsim thak kong guan dinga; na sunguah kha thak ka guang ding hi. Na suang lungtang uh ka lakhia dinga satak lungtang kong guan ding hi. 27Note sungah ka Kha ka guang dinga ka thukipte hong zuisakin ka thukhamte limtakin kong tangsak ding hi. 28Na pute uh ka piaksa gam sungah na teng ding uh hi; note keima mi na hi ding uh a, keimah note Pasian ka hi ding hi. 29Na siantholohna khempeuh panun kong honkhia ding hi. An ka sam dinga tampi phasakin kialpi hong tung nawn kei ding hi. 30Kialpi hangin minamte lakah na maimawl nawn loh nadingun na singgahte uh gahphasakin na lo-uah an tampi ka piangsak ding hi. 31Tua ciangin na gamtat hoihlohna uh le na gitlohna uh na phawk ding uh a, na mawhnate uh le a kihhuai na gamtatnate uh hangin no le no na kikih ding uh hi. 32Keimah in note kong khualna-a ka hih loh ahilam na theih ding uh ka deih hi, Thupipen TOPA in cikhia hi. Israel innkuante aw, maizum unla na gamtatnasate uh hangin maimawl un!

33 “’Hih in Thupipen TOPA gen ahi hi: Na mawhnate khempeuh panun kong siansak ni-in na khuapite uah kong tengsak kik dinga a siate a kilampha ding hi. 34A tawnkhate muhna ah gamval a suak gamte gamval hi nawn loin kikho ta ding hi. 35Amaute in, “Hih a kimawk nusiat gam, Eden huan bang ta hi; a kisusia gamkhinga om a kisia khuapite tu-in mi tenga kulhin ki-um ta hi,” ci ding uh hi. 36Tua ciangin note kima om minamte in, keimah TOPA in a kisusiate lam kikin gamkhing teng a kikhosak kikpa ka hilam a thei ding uh hi. Keimah TOPA in ka gensa hi a, ka sem ding hi,’ ci hi.

37 “Hih in Thupipen TOPA gen ahi hi: Israel innkuante ngetna ka mang kik dinga amau adingin hih ka sem ding hi: a mite uh tuu zahin 38Jerusalem-a a kisehsa pawite a biakna ding tuuhonte zahin ka tamsak ding hi. Tua ciangin a kisiasa khuapite ah mihing honpi dim ding hi. Tua ciangin amaute in keimah TOPA ka hilam hong thei ding uh hi,” a ci hi.